Debido ás condicións climáticas da semana transcorrida desde a emisión do aviso anterior, houbo condicións para a esporulación do patóxeno practicamente todos os días segundo as estacións, ao haber de noite mais de catro horas con humidade relativa moi elevada e/ou humidade foliar unidas a temperaturas suaves, por riba, en xeral, dos 12ºC. Ademais, houbo precipitación lixeira entre venres 28 e sábado 29 (inapreciable case nalgunhas localidades pero sempre moi reducida), e desde onte xoves día 3 tamén se está a producir na maioría das comarcas, aínda que en cantidades moi pequenas.

Pese a estas condicións favorables ao mildio, na visita dos días 1 (Salnés) e 2 (Condado, Rosal) ás parcelas da nosa rede e a outras que visitamos, apenas notamos evolución na porcentaxe de follas con presenza de manchas (que se localizan basicamente nos gromos terminais), mesmo nas plantas testemuña onde, loxicamente, o número e superficie ocupada polas manchas é maior. Iso si, as manchas presentaban unha esporulación máis ou menos evidente segundo se atopasen en plantas sen tratamentos ou tratadas, e tamén a observamos mesmo en manchas antigas.

En principio esta sintomatoloxía non debería ter maior incidencia se, como anuncian as previsións a día de hoxe, durante a semana entrante haberá tempo seco, basicamente soleado e ventos de dirección Norte ou variable. Porén, pode reducirse a infección eliminando a vexetación nova afectada, ou ben, como dixemos no aviso anterior, no caso de que aparezan moitas manchas nas follas ou danos nas varas a consecuencia deste clima máis húmido, aplicar un tratamento cúprico se existe risco de defoliación.

Non obstante, e como sempre dicimos, este patóxeno está moi condicionado polo estado sanitario da uva de xeito que, si se mantivo sa ao longo da campaña (caso máis habitual este ano), non é probable que se produzan danos aínda que haxa períodos con condicións máis favorables á enfermidade (humidade moi elevada durante horas máis temperaturas altas). Neste momento existen no mercado funxicidas antibotríticos que aínda se poden aplicar dirixidos aos acios (salvo nos casos en que as adegas limiten os tratamentos) polo seu menor prazo de seguridade (14 días).

Canto ao reconto de ninfas nas follas de todas as parcelas que visitamos (as nosas habituais de seguimento e outras) apenas foron observadas, e mesmo na finca de Tollo a cifra máxima foi de tres en cen follas, co que en ningún caso demos a recomendación de aplicar un tratamento.

Ao marxe da presenza das plantas con síntomas de alteracións da madeira, son cada vez máis evidentes os síntomas debidos á seca deste ano, en especial en plantacións con solo escaso e/ou mal equilibrado.

No mes de xuño colocamos trampas para detectar este insecto nunhas nogueiras da comarca de Pontevedra. O voo da especie empezou na terceira semana de xullo pero nas últimas dúas semanas estamos tendo o maior número de capturas (do orde de 25 adultos por trampa). Trátase dun insecto que destrúe a casca verde da noz, que podrece e seca, e que diminúe a calidade das noces, así como a cantidade, porque ataques temperás fan caer os froitos que se están a formar. En España non hai insecticidas especificamente destinados ao control desta praga, así que é importante eliminar os froitos caídos ao chan para evitar que as larvas se enterren para pupar.