Do mesmo xeito que a semana anterior, as temperaturas nocturnas foron relativamente elevadas a partir do día 2, e especialmente o 3 e o 4, onde mesmo acadaron valores, nalgunhas estacións meteorolóxicas, no entorno dos 19ºC. Con todo, a humidade relativa non foi elevada e tampouco houbo períodos longos de humidade foliar salvo estas dúas últimas noites, e especialmente a pasada, consecuencia das precipitacións que houbo en zonas da metade sur da provincia (ata 20 l/m² en Cequeliños). De feito, dispoñemos de datos analizados no captador de esporas das filas testemuña de Areeiro ata o día 4 (incluído), e neses datos se observa que precisamente nos dous últimos días o volume de esporas (esporas/m³ de aire) sufriu un incremento, que aínda será máis notorio cando estean analizados os datos de onte ou hoxe. Pola súa banda, no captador instalado entre dúas liñas tratadas, a carga máxima deuse precisamente o día 4 con 19 esporas/m³, estando o resto de días dos que dispoñemos de dato entre 3 e 9 esporas/m³.

Globalmente, na visita desta semana ás viñas efectuada os días 4 (Salnés) e 5 (Condado, Rosal), non observamos síntomas e non houbo cambios fronte á semana anterior salvo nalgunhas plantas testemuña, onde apareceron manchas (illadas ou máis numerosas) na nova vexetación. Nos acios, a presenza de mildio é anecdótica salvo nestas plantas testemuña debido á progresión das infeccións anteriores. Segundo as previsións meteorolóxicas, a partir do luns 10 o tempo estará seco e soleado. Non obstante, é necesario continuar coa vixilancia debido ás precipitacións que se produciron nalgunhas zonas ou que se poden dar este fin de semana segundo algunha axencia meteorolóxica, especialmente naquelas fincas onde está próximo a finalizar o período de protección do anterior tratamento (ou este xa se superara, como en moitas das parcelas da nosa rede).

Da mesma forma que no caso dos cicadélidos, non observamos síntomas de acariose ou de araña vermella, e unicamente permanecen ou se incrementa a erinose nalgunhas fincas.

Nalgunhas plantas dunha viña de O Salnés vimos pequenas picaduras ferruxinosas nas follas máis tenras que apuntaban á presenza de trips, polo que recollemos follas. Baixo a lupa binocular confirmamos a presenza de poboacións destes insectos. Vixiaremos a evolución por se fora preciso tratar.

As temperaturas elevadas seguen a favorecer a expresión de síntomas de alteracións da madeira, tanto dunha forma lenta como apopléxica.

Cada vez son máis frecuentes os acios con danos directos por golpes de sol. A posta en práctica dos esfollados e a eliminación do exceso de frondosidade fai posible a súa ventilación. Porén, a eliminación de follas, como sempre dicimos, debe ser moderada, e nunca debe facerse en condicións de temperatura moi alta para evitar a exposición excesiva ao sol das uvas antes ocultas.