As precipitacións acaecidas o fin de semana (cunha contía de entre 10 e 25 l/m² segundo as estacións meteorolóxicas) non estiveron, en xeral, acompañadas por temperaturas nocturnas suficientemente elevadas como para producir esporulación e non se deron condicións para a infección secundaria. Despois, aínda que houbo subida de temperaturas, xa non se produciron precipitacións e/ou non houbo humidade foliar ata hoxe venres.

Con esta situación, na visita do mércores día 3 ás parcelas da nosa rede de seguimento (a maioría delas cun só tratamento, e xa fora do período de protección do produto empregado) e a outras que visitamos, unicamente atopamos unha mancha nova (sen esporulación). As outras que, dun xeito moi puntual, había nas fincas, non evolucionaran e presentaban a esporulación inviable, ben sexa a consecuencia do tratamento anterior ou ás condicións climáticas desfavorables. Pola súa banda, as plantas sen tratamento algún, tanto as que mantemos nalgunhas das nosas parcelas como aquelas abandonadas ou que medran en muros, aparecen tamén limpas de síntomas debido ao frío e á seca que levamos sufrindo (e que xa empezou a manifestarse no ton amarelento dalgunhas plantas).

Tendo en conta que xa comezou a precipitación prevista para hoxe venres, que esta noite xa houbo condicións para a infección secundaria, e que as previsións anuncian un período de choivas con temperaturas nocturnas altas a partir do próximo martes día 9 (e ata polo menos o domingo 14), a nosa recomendación varía segundo a situación concreta:

• Naquelas protexidas por un tratamento anterior, vixiar o estado das plantas despois desta choiva, e non renovalo de momento se non se observan novos síntomas;
• Naquelas non protexidas pero en localizacións abrigadas ou especialmente sensibles, tratar o antes posible despois de hoxe venres;
• Naquelas non protexidas pero limpas de síntomas en xeral, renovar o tratamento antes do período de precipitación anunciado a partir de martes.